SAVA. Bar Pedro -Storia di un bar
Questa testimonianza è di Antonio Spada, da sempre frequentatore legato ai ricordi e alla storia del Bar Pedro
Lu Bar Pedru jè dduratu
mienzu sièculu ‘antaggiàtu.
Lu Bar Pedru fuèi apièrtu
ti li fratelli Solopertu
Sparimampiéttu era la ngiùria ti Ntunùcciu
piccè era forti e fatiàva comu nnu ciùcciu.
Fràusa Nninu, ti la società era la menti
e ssi ccattiàva li clienti.
‘Štu bar, nna fiàta avviàtu,
Ntoniu Lomàrtiri si l’è ccattàtu.
Moti clienti ca fuèra tištimoni
all’otru munnu štonu, e no hai ti moni.
Li fatti ti lu Pedru li conta, cu li nomi,
Ntòniu Lomàrtiri il nuovo patròni.
Quannu lu bar fuèi apièrtu, ‘štu paesi štera arretràtu
a šta cosa noa no era ancora priparàtu.
‘Št’ùrtim’anni lu bar s’era nnu picca degradàtu,
era persu lu splendòri ti quann’era natu:
lu mubiliu, per esèmpiu, no era statu mai rinnovàtu.
Ti la vera Pùccia era rimàštu lu nomi
(pi difèndiri la bona tradizioni).
Crazzi a Ntòniu e alla sua invenzioni
la Pùccia è ddintàta famosa
com’è ggiùštu cu sia nna bona cosa.
Ncunu giòini ti moni sapi la štoria ti lu “Bar Torrefaziòni”
ca l’era ntisa cuntàri ti ncunu tištimòni.
Tannu la Sala di The, picca la fècira ddurari
piccè a carti si mèsara a sciucàri.
Puru la televisioni štera,
ti la putìi ‘ètiri matina e sera.
Professioništi, artièri, ‘illani e suggetti
bbàsciu allu biliàrdu facìunu li tretti
quannu ci pi rrìtiri sputtìunu Giuacchinu Capacànti
ca, cu la littòrica sua, rispunnìa:
“Chi vi ha ottenuti la spurchia? – -I tribunali non mi fanno ombra!”.
Li schièrzi tannu si pinsàunu la sera
e cussì svagànnu ‘inìunu moti foreštièri.
Èrunu li tiempi, quiri ddani
ca si facìunu li schièrzi alli crištiani.
La pacènzia mo’ si n’è sciuta girannu
e, ci ti va spòttunu osci, cu la leggi ha’ sci’ scappànnu.
Moti crištiani, quasi tutti,
onna štati tištimoni ti cosi bueni e ti cosi brutti.
Nna cosa ca n’è rumašta a memoria
fuèi la sera ti la sparatoria.
Nn’otra cosa ancora ca si conta
so’ li spaghetti an capu a Pruulòni.
E cussì passàmmu la serata
facènnu ti purpètti nna pitrisciàta.
Tutti quiddi ca ti lu Bar Pedru ona štati tištimoni
štonn’an cièlu, e no hai ti moni.
Antonio SPADA – settembre 2017
